Тропари, кондаки, величания и задостойники на двунадесятые праздники

Рождество Пресвятой Богородицы. 8/21 сентября

Тропарь, глас 4-й

Рождествó Твоé Богорóдице Дéво, рáдость возвести́ всей вселéнней: из Тебé бо возсия́ Сóлнце прáвды Христóс Бог наш, и разруши́в кля́тву, дадé благословéние, и упраздни́в смерть, даровá нам живóт вéчный.

Кондак, глас 4-й

Иоаки́м и Áнна поношéния безчáдства, и Адáм и Éва от тли смéртныя свободи́стася, Пречи́стая, во святéм рождествé Твоéм. То прáзднуют и лю́дие Твои́, вины́ прегрешéний избáвльшеся, внегдá звáти Ти: неплóды раждáет Богорóдицу и питáтельницу жи́зни нáшея.

Величание

Величáем Тя, Пресвятáя Дéво, и чтим святы́х Твои́х роди́телей, и всеслáвное слáвим рождествó Твоé.

Задостойник, глас 8-й

Чу́жде мáтерем дéвство, и стрáнно дéвам деторождéние; на Тебé, Богорóдице, обоя́ устрóишася. Тем Тя вся племенá земнáя непрестáнно величáем.

Воздвижение Честного и Животворящего Креста 14/27 сентября

Тропарь, глас 1-й

Спаси́, Гóсподи, лю́ди Твоя́ и благослови́ достоя́ние Твоé, побéды правослáвным христиáном на сопроти́вныя дáруя, и Твоé сохраня́я Крестóм Твои́м жи́тельство.

Кондак, глас 4-й

Вознесы́йся на Крест вóлею, тезоимени́тому Твоему́ нóвому жи́тельству щедрóты Твоя́ дáруй, Христé Бóже; возвесели́ нас си́лою Твоéю, побéды дая́ нам на супостáты, посóбие иму́щим Твоé, ору́жие ми́ра, непобеди́мую побéду.

Величание

Величáем Тя, Живодáвче Христé, и чтим Крест Твой святы́й, и́мже нас спасл еси́ от рабóты врáжия.

Задостойник, глас 8-й

Тáин еси́, Богорóдице, рай, невоздéланно возрасти́вший Христá, И́мже Крéстное живонóсное на земли́ насади́ся дрéво. Тем ны́не возноси́му, покланя́ющеся ему́, Тя величáем.

Введение во храм Пресвятой Богородицы 21 ноября/4 декабря

Тропарь, глас 4-й

Днесь благоволéния Бóжия предображéние и человéков спасéния проповéдание, в хрáме Бóжии я́сно Дéва явля́ется и Христá всем предвозвещáет. Той и мы велеглáсно возопии́м: рáдуйся, смотрéния Зи́ждителева исполнéние.

Кондак, глас 4-й

Пречи́стый храм Спáсов, многоцéнный чертог и Дéва, свящéнное сокрóвище слáвы Бóжия, днесь ввóдится в дом Госпóдень, благодáть совводя́щи, я́же в Ду́се Божéственном, ю́же воспевáют Áнгели Бóжии; Сия́ есть селéние небéсное.

Величание

Величáем Тя, Пресвятáя Дéво, Богоизбрáнная Отрокови́це, и чтим éже в храм Госпóдень вхождéние Твоé.

Задостойник, глас 4-й

Я́ко одушевлéнному Бо́жию киво́ту, да никáкоже коснéтся рукá сквéрных; устнé же вéрных, Богорóдице немóлчно глас Áнгела воспевáюще, с рáдостию да вопию́т: и́стинно вы́шши всех еси́, Дéво Чи́стая.

Рождество Гóспода нашего Иисуса Христа 25 декабря/7 января

Тропарь, глас 4-й

Рождествó Твоé, Христé Бóже наш, возсия́ ми́рови свет рáзума, в нем бо звездáм служáщии звездóю учáхуся Тебé клáнятися, Сóлнцу прáвды, и Тебé вéдети с высоты́ Востóка. Гóсподи, слáва Тебé!

Кондак, глас 3-й

Дéва днесь Пресущéственнаго раждáет, и земля́ вертéп Непристу́пному принóсит; Áнгели с пáстырьми славослóвят, волсви́ же со звездóю путешéствуют; нас бо рáди роди́ся Отрочá млáдо, превéчный Бог.

Величание

Величáем Тя, Живодáвче Христé, нас рáди ны́не плóтию рóждшагося от безневéстныя и Пречи́стыя Дéвы Мари́и.

Задостойник, глас 1-й

Люби́ти у́бо нам, я́ко безбéдное стрáхом, удóбее молчáние, любóвию же, Дéво, пéсни ткáти спротя́женно сложéнныя, неудóбно есть: но и, Мáти, си́лу, ели́ко есть произволéние, даждь.

Крещение Господа нашего Иисуса Христа 6/19 января

Тропарь, глас 1-й

Во Иордáне крещáющуся Тебé, Гóсподи, Трóическое яви́ся поклонéние: Роди́телев бо глас свидéтельствоваше Тебé, возлю́бленнаго Тя Сы́на имену́я, и Дух, в ви́де голуби́не, извествовáше словесé утверждéние. Явлéйся, Христé Бóже, и мир просвещéй, слáва Тебé.

Кондак, глас 4-й

Яви́лся еси́ днесь вселéнней, и свет Твой, Гóсподи, знаменáся на нас, в рáзуме пою́щих Тя; пришéл еси́ и яви́лся еси́, Свет непристу́пный.

Величание

Величáем Тя, Живодáвче Христé, нас рáди ны́не плóтию крести́вшагося от Иоáнна в водáх Иордáнских.

Тропари на водоосвящении, глас 8-й

Глас Госпóдень на водáх вопиéт глаго́ля: прииди́те, приими́те вси Ду́ха прему́дрости, Ду́ха рáзума, Ду́ха стрáха Бóжия, я́вльшагося Христá.

Днесь вод освящáется естествó, и разделя́ется Иордáн, и свои́х вод возврáщает стру́и, Влады́ку зря крещáема.

Я́ко человéк на рéку пришéл еси́, Христé Царю́, и рáбское крещéние прия́ти тщи́шися, Блáже, от Предтéчеву руку́, грех рáди нáших, Человеколю́бче!

Слáва и ны́не:

Ко глáсу вопию́щаго в пусты́ни, уготóвайте путь Госпо́день, пришéл еси́, Гóсподи, зрак рáбий прии́м, крещéния прося́, не вéдый грехá. Ви́деша Тя вóды и убоя́шася, трéпетен бысть Предтéча, и возопи́ глагóля: кáко просвети́т свети́льник Свéта, кáко ру́ку положи́т раб на Влады́ку? Освяти́ менé и вóды, Спáсе, взéмляй ми́ра грех.

Задостойник, глас 2-й

Недоумéет всяк язы́к благохвали́ти по достоя́нию, изумевáет же ум и преми́рный пéти Тя, Богорóдице; обáче Благáя су́щи, вéру приими́, и́бо любóвь вéси божéственную нáшу: Ты бо христиáн еси́ Предстáтельница, Тя величáем.

Сретение Господа нашего Иисуса Христа 2/15 февраля

Тропарь, глас 1-й

Рáдуйся, Благодáтная Богорóдице Дéво, из Тебé бо возсия́ Сóлнце прáвды, Христóс Бог наш, просвещáяй су́щия во тьме. Весели́ся и ты, стáрче прáведный, приéмый во объя́тия Свободи́теля душ нáших, дáрующаго нам воскресéние.

Кондак, глас 1-й

Утрóбу Дéвичу освяти́вый рождествóм Твои́м, и ру́це Симеóне благослови́вый, я́коже подобáше, предвари́в, и ны́не спасл еси́ нас, Христé Бóже; но умири́ во брáнех жи́тельство, еди́не Человеколю́бче.

Величание

Величáем Тя, Живодáвче Христé, и чтим Пречи́стую Мáтерь Твою́, Éюже по закóну ны́не принéслся еси́ в храм Госпóдень.

Задостойник, глас 3-й

В зако́не, сéни и писáний о́браз ви́дим вéрнии, всяк му́жеский пол, ложеснá разверзáя, свят Бóгу. Тем перворождéнное Слóво Отцá Безначáльна, Сы́на первородя́щася Мáтерию неискусому́жно, величáем.

Благовещение Пресвятой Богородицы 25 марта/7 апреля

Тропарь, глас 4-й

Днесь спасéния нáшего глави́зна, и éже от вéка тáинства явлéние; Сы́н Бóжий Сы́н Дéвы бывáет, и Гаврии́л благодáть благовеству́ет. Тéмже и мы с ним Богоро́дице возопии́м: рáдуйся, Благодáтная, Госпóдь с Тобóю.

Кондак, глас 8-й

Взбрáнной Воевóде победи́тельная, я́ко избáвльшеся от злых, благодáрственная воспису́ем Ти раби́ Твои́, Богорóдице, но я́ко иму́щая держáву непобеди́мую, от вся́ких нас бед свободи́, да зовéм Ти: рáдуйся, Невéсто Неневéстная.

Величание

Архáнгельский глас вопиéм Ти, Чи́стая: рáдуйся, Благодáтная, Госпóдь с Тобóю.

Задостойник, глас 4-й

Я́ко одушевлéнному Бóжию Кивóту, да никáкоже коснéтся рукá сквéрных. Устнé же вéрных Богорóдице немóлчно, глас Áнгела воспевáюще, с рáдостию да вопию́т: рáдуйся, Благодáтная, Госпóдь с Тобóю.

Вход Господень в Иерусалим (последнее воскресенье перед Пасхой)

Тропарь, глас 1-й

Óбщее воскресéние прéжде Твоея́ стрáсти уверя́я, из мéртвых воздви́гл еси́ Лáзаря, Христé Бо́же. Тéмже и мы, я́ко óтроцы побéды знáмения нося́ще, Тебé победи́телю смéрти вопиéм: осáнна в вы́шних, благословéн Гряды́й во и́мя Госпóдне.

Тропарь, глас 4-й

Спогрéбшеся Тебé крещéнием, Христé Бóже наш, безсмéртныя жи́зни сподóбихомся воскресéнием Твои́м, и воспевáюще зовéм: осáнна в вы́шних, благословéн Гряды́й во и́мя Госпóдне.

Кондак, глас 6-й

На престóле на небеси́, на жребя́ти на земли́ носи́мый, Христé Бóже, Áнгелов хвалéние и детéй воспевáние прия́л еси́ зову́щих Ти: благословéн еси́, гряды́й Адáма воззвáти.

Задостойник, глас 4-й

Бог Госпóдь и яви́ся нам, состáвите прáздник, и веселя́щеся прииди́те, возвели́чим Христá, с вáиями и вéтвьми, пéсньми зову́ще: благословéн Гряды́й во и́мя Гóспода Спáса нáшего!

Светлое Христово Воскресение. Пасха

Стихира, глас 6-й

Воскресéние Твоé, Христé Спáсе, Áнгели пою́т на небесéх, и нас на земли́ сподóби чи́стым сéрдцем Тебé слáвити.

Тропарь, глас 5-й

Христóс воскрéсе из мéртвых, смéртию смерть попрáв и су́щим во гробéх живóт даровáв.

Кондак, глас 8-й

Áще и во гроб снизшéл еси́, Безсмéртне, но áдову разруши́л еси́ си́лу, и воскрéсл еси́, я́ко Победи́тель, Христé Бóже, женáм миронóсицам вещáвый: рáдуйтеся! и Твои́м апóстолом мир дáруяй, пáдшим подая́й воскресéние.

Воскресéние Христóво ви́девше, поклони́мся Святóму Гóсподу Иису́су, еди́ному безгрéшному, Кресту́ Твоему́ покланя́емся, Христé, и святóе воскресéние Твоé поéм и слáвим: Ты бо еси́ Бог наш, рáзве Тебé инóго не знáем, и́мя Твоé имену́ем. Прииди́те, вси вéрнии, поклони́мся святóму Христóву воскресéнию; се бо прии́де Крестом рáдость всему́ ми́ру; всегдá благословя́ще Гóспода, поéм воскресéние Егó, распя́тие бо претерпéв, смéртию смерть разруши́.

Ексапостиларий Пасхи

Плóтию усну́в, я́ко мертв. Царю́ и Го́споди, триднéвен воскрéсл еси́, Адáма воздви́г от тли и упраздни́в смерть: Пасхá нетлéния, мира спасéние.

Задостойник, глас 1-й

Áнгел вопия́ше Благодáтней: Чи́стая Дéво, рáдуйся! И пáки реку́: рáдуйся! Твой Сы́н воскрéсе триднéвен от грóба, и мéртвыя воздви́гнувый: лю́дие, весели́теся.

Свети́ся, свети́ся, нóвый Иерусали́ме: слáва бо Госпóдня на тебé возсия́. Лику́й ны́не и весели́ся, Сиóне. Ты же, Чи́стая, красу́йся, Богорóдице, о востáнии Рождествá Твоегó.

Вознесение Господа нашего Иисуса Христа (в 40-й день по Воскресении)

Тропарь, глас 4-й

Вознéслся еси́ во слáве, Христé Бóже наш, рáдость сотвори́вый ученикóм обетовáнием Святáго Ду́ха, извещéнным им бы́вшим благословéнием, я́ко Ты еси́ Сы́н Бóжий, Избáвитель ми́ра.

Кондак, глас 6-й

Éже о нас испóлнив смотрéние, и я́же на земли́ соеди́нив небéсным, вознéслся еси́ во слáве, Христé Бóже наш, никáкоже отлучáяся, но пребывáя неотсту́пный, и вопия́ лю́бящим Тя: Аз есмь с вáми и никтóже на вы.

Величание

Величáем Тя, Живодáвче Христé, и почитáем éже на небесá с пречи́стою Твоéю Плóтию Божéственное вознесéние.

Задостойник, глас 1-й

Тя пáче ума и словесé Мáтерь Бóжию, в лéто Безлéтнаго неизречéнно Рóждшую, вéрнии единому́дренно величáем.

Пятидесятница. День Святой Троицы (50-й день по Воскресении)

Тропарь, глас 8-й

Благословéн еси́, Христé Бóже наш, И́же прему́дры ловцы́ явлéй, низпослáв им Ду́ха Святáго, и тéми уловлéй вселéнную, Человеколю́бче, слáва Тебé.

Кондак, глас 8-й

Егдá снизшéд язы́ки слия́, разделя́ше язы́ки Вы́шний, егдá же óгненныя язы́ки раздая́ше, в соединéние вся призвá; и соглáсно слáвим Всесвятáго Ду́ха.

Величание

Величáем Тя, Живодáвче Христé, и чтим Всесвятáго Ду́ха Твоего́, Его́же от Отцá послáл еси́ божéственным ученикóм Твои́м.

Задостойник, глас 1-й

Рáдуйся, Цари́це, матеродéвственная слáво: вся́ка бо удобообращáтельная благоглагóливая устá витии́ствовати не мóгут, Тебé пéти достóйно; изумевáет же ум всяк Твоé рождествó разумéти. Тéмже Тя соглáсно слáвим.

Преображение Господа нашего Иисуса Христа 6/19 августа

Тропарь, глас 7-й

Преобрази́лся еси́ на горé, Христé Бóже, показáвый ученико́м Твои́м слáву Твою́, я́коже можáху; да возсия́ет и нам грéшным свет Твой присносу́щный, моли́твами Богорóдицы, Светодáвче, слáва Тебé.

Кондак, глас 7-й

На горé преобрази́лся еси́, и я́коже вмещáху ученицы́ Твои́, слáву Твою́, Христé Бóже, ви́деша; да егдá Тя узрят распинáема, страдáние у́бо уразумéют во́льное, ми́рови же проповéдят, я́ко Ты еси́ вои́стинну Óтчее сия́ние.

Величание

Величáем Тя, Живодáвче Христé, и почитáем пречи́стыя плóти Твоея́ преслáвное преображéние.

Задостойник, глас 4-й

Рождествó Твоé нетлéнно яви́ся, Бог из боку́ Твоéю прóйде, я́ко Плотонóсец яви́йся на земли́, и с человéки поживé. Тя, Богорóдице, тем вси величáем.

Успение Пресвятой Богородицы 15/28 августа

Тропарь, глас 1-й

В рождествé дéвство сохрани́ла еси́, во успéнии ми́ра не остáвила еси́, Богорóдице, престáвилася еси́ к живóту, Мáти су́щи Животá, и моли́твами Твои́ми избавля́еши от смéрти ду́ши нáша.

Кондак, глас 2-й

В моли́твах неусыпáющую Богорóдицу и в предстáтельствах непрелóжное уповáние, гроб и умерщвлéние не удержáста: я́коже бо Живóта Мáтерь, к животу́ престáви во утрóбу Всели́выйся приснодéвственную.

Величание

Величáем Тя, Пренепорóчная Мáти Христá Бóга нáшего, и всеслáвное слáвим успéние Твоé.

Задостойник, глас 1-й

Побеждáются естествá устáвы в Тебé, Дéво чи́стая, дéвствует бо рождествó, и живóт предобручáет смерть; по рождествé Дéва, и по смéрти живá, спасáеши при́сно, Богорóдице, наслéдие Твоé.

×